Glóandi húð

Húðin er stærsta líffæri líkamans og fyrsta varnarlínan sem verndar líkamann gegn neikvæðum ytri þáttum eins og útfjólubláum geislum, efnum og bakteríum. Húðin er einnig viðkvæm fyrir tilfinningalegu álagi og streitu, hormónabreytingum og óhollu mataræði. Heilsusamleg næring er einn af mörgum þáttum sem þarf að taka tillit til við að viðhalda heilbrigði húðar. Ófullnægjandi næringarástand getur haft skaðleg áhrif á bæði uppbyggingu og líffræðilega starfsemi húðarinnar og leitt til myndunar á óeðlilegu varnarlagi húðar. Sífellt fleiri rannsóknir sýna að næring er mikilvægur þáttur í að vinna gegn ýmsum húðvandamálum og hefur komið fram að næringarefni eins og A-, C-, D- og E-vítamín, sem og omega-3 fitustýrur og astaxanthin geti verið gagnleg fyrir t.a.m. exem og psoriasis. Þessi næringarefni eru ekki aðeins notuð sem virk efni í meðferðarskyni til að lina einkenni ýmissa húðkvilla, heldur einnig sem innihaldsefni í snyrtivörum. Omega-3 fitusýrur eru mikilvægar fyrir húðina og eru bólguhamlandi. C-vítamín er einnig mikilvægt húðvítamín styður við kollagen framleiðslu. Astaxanthin er kröftugt andoxunarefni sem er talið stuðla að heilbrigði húðar með því að auka raka og teygjanleika húðar. Astaxanthin er notað sem fyrirbyggjandi bætiefni til þess að verja húðina gegn skaðlegum geislum sólar, ásamt því að draga úr hrukkum og ótímabærri öldrun húðar.

Húðin og þarmaflóran

Margar rannsóknir hafa tengt heilsu meltingarvegarins við jafnvægi húðarinnar og það eru vísbendingar um tvíátta samskipti milli þarma og húðar. Einhvers konar röskun á fjölbreytileika þarmaflóru getur aukið viðkvæmni og truflað ónæmisþol sem getur síðan haft áhrif á húðheilsu. Nokkrir húðkvillar svo sem bólur, exem, psoriasis og rósroði tengjast raskaðri þarmaflóru. Ein rannsókn sýndi fram á tengsl milli þarmaflóru og húðheilsu og kom fram að leggja ætti áherslu á að bæta við forlífsgerlum, góðgerlum og gerjaðri fæðu í mataræðið fyrir heilbrigða þarmaflóru sem og húð. Milljarðar örvera og þá aðallega bakteríur sem eru meltingarvegi okkar framleiða ákveðin vítamín, taugaboðefni og stuttar fitusýrukeðjur, sem hvert og eitt hefur áhrif á húðheilsu. Mælt er með því að borða trefjar sem er næring fyrir góðu bakteríurnar og taka inn góðgerla til þess að koma jafnvægi á þarmaflóruna. Að borða fjölbreytt, litríkt og plöntumiðað mataræði er góð leið til að stuðla að heilbrigðu jafnvægi í þarmaflórunni og fá úrval næringarefna og plöntuefna sem vernda húðina okkar. Næringarríkar fæðutegundir sem eru húðvænar eru t.a.m. avókadó, gulrætur, hörfræ, möndlur, valhnetur, ber og feitur fiskur.

Kollagen fyrir húðina

Kollagen er algengasta uppbygingarpróteinið í líkamanum og húðinni. Náttúrulegt magn þessa nauðsynlega próteins minnkar þegar við eldumst. Kollagen bætiefni innihalda amínósýrur sem hafa sýnt sig að styðja við heilbrigði hárs, húðar og nagla. Rannsóknir sýna að kollagenpeptíð geta stuðlað að teygjanleika og þéttleika í húðinni. Með því að neyta vatnsrofinna kollagenpeptíða getum við stutt við náttúrulegt kollagenmagn og stuðlað þannig að heilbrigðari húð. Eyðing kollagens er ein helsta orsök hrukkumyndunar og öldrun húðarinnar en inntaka kollagens er talin geta hægt á hrukkumyndyn og stuðlað að unglegri og frísklegri húð.

Það er lykilatriði fyrir góða húðheilsu að nota örugga sólarvörn daglega allt árið um kring til þess að vernda húðina gegn útfjólublárri geislun, sem er talin vera ein helsta orsök áferða- og litabreytinga sem fylgja öldrun húðarinnar og ótvíræður krabbameinsvaldur. Að viðhalda heilbrigðri húð þarf ekki að fela í sér dýr krem eða ífarandi aðgerðir. Með því að innleiða náttúrulegar og heildrænar aðferðir geturðu stutt við heilsu húðarinnar að innan frá.